用 Python3 來做計算機

咱了解欲按怎安裝, 運行 Python 了後, 就會使開始使用囉.

Python 是一咧工具, 你會使共當做耍物仔, 嘛會使用伊來賺食. 就干焦唱歌, 有人家己hinn-hinn-honn-honn 唱歡喜, 嘛有人上舞台做大歌星. 一支筆, 有人寫來記數 niâ-niâ, 嘛有人寫出大部的小說天跤下攏知影伊的名. 總是, 踮電腦的天跤下, 抑是網路的世界, Python 是足有路用的專業工具.

毋過, 咱若欲入門, 嘛免想遐濟. 伊嘛是會使用來耍, 用來解決一寡生活的零星代,趣味就好. 這馬咱先來共伊當做計算機來用.

咱先進入伊的應聲模式:

$ python3
>>> 4 + 6
10
>>> 20 - 7 *2
6
>>> (20 - 7*2)/4
1.5
>>> 100/3
33.333333333333336
>>>

踮頂懸的例tiőng, 咱共上基本的加[ka]，減[kiám]，乘[sîng]，分[pun, 華語:除] 行一遍。踮遮, 台語念法參考筆算个初學這本書.

數學符號, 加是 +, 減是 -, 無問題. 毋過乘改作 *, 分改作 /.
圓括號 () 的意義佮數學定義仝款, 優先計算.
按呢是毋是真簡單呢?

有時, 你揤一捾落落長的算式, 算了才發現有毋著, 欲按怎? 閣重新一字一字揤?

免遐囉嗦--啦, 只要揤向頂的箭頭 ↑ 就會轉去拄仔彼例算式, 才閣揤正鍵→,倒鍵←,倒退鍵(Backspace), 挕掉鍵 (Delete) 來改正.
有時, 你想欲頂一咧計算的結果, 用佇這馬這咧計算, 若按呢愛用底線 _, 比如講:

>>> 2 + 4 +5/3
7.666666666666667
>>> 2 * _
15.333333333333334
>>> 

對分法, 咱閣愛討論較幼咧. 分法有時會分袂了, 欲有賰數(remainder, 華語: 餘數), 抑是直接共賰數擲掉? 抑是欲算幾位的小數? 佇 Python3, 咱用無仝的算符 (operator) 來區別:

>>> 17/3

5.666666666666667

>>> 17//3

5

>>> 17%3

2

斜線 / 是算出小數, 雙斜線是干焦留整數, 百分比 % 是干焦留賰數。

指數 (power) 是雙星 ** 來代表:

>>> 5**2
25

Python3 的數學規則, 親像先乘分, 後加減, uì 倒手爿算到正手爿, 攏佮數學仝款。

Python ê 戲文模式

戲文(script, 華語:劇本,台詞) 模式, 就是你愛先共欲做的代誌先寫予好, 囥佇一咧文字檔內底. 紲落來才叫 python 去讀這咧文字檔案, 按照te̋ 做. 就干焦演員愛照戲文來搬戲仝款.

戲文愛先uì頭到尾寫予好, 無 Python 搬戲搬到一半會搬袂落去.

咱這馬先來寫一咧上簡單的戲文,拍開凊彩一咧你慣勢的文字編輯程式, 像 Notepad(記事本), UltraEdit, gedit, vi/vim, 攏會使. 毋過, Microsooft Word 是袂用--得, 因為伊毋是純文字檔。伊的檔尾溜是 .doc. 純文字檔的檔尾溜是 .txt. 佇 Python, 咱會予伊一个專用的檔尾溜: .py.

咱就來寫一咧簡單戲, 拍開了後, 寫下跤的詞:

#!/usr/bin/python3
print("gâu 早, 咱來算數")
sum = 1 + 3 *6 + 7/3
print(sum)

共伊號一咧名, 譬如講 simple.py, 儉--起來. 拍開命令窗, 叫 python3 來搬戲囉

$ python3 simple.py 

gâu 早, 咱來算數

21.333333333333332

$
佇這段戲文內, 咱干焦叫 Python 做三項代誌: 先 ai̋-sah-tsut 一咧, 算數, 共答案印--出來.
伊佮應聲模式無仝款, 戲文乎伊, 伊就佮戲文uì頭到尾做了, 就煞鼓跳出來阿！

Python ê 應聲模式

Python 有兩種運行的模式, 一種號做戲文模式, 另一種是應聲模式。
戲文模式佇遮紹介.


應聲(interactive, 華語:交談) 模式, 就干焦兩人佇答喙鼓, 你就和 Python 佇答喙鼓. 你講一句, 伊隨喙就應。這模式其實是 uì 命令窗仝款个意思.
這馬, 咱先來欲起動應聲模式, 就是干焦佇命令窗內揤 "python3", "ENTER", 看著三支角 ">>>", 就入去應聲模式。

這咧時陣, 你踮內揤啥物, 上尾揤 ENTER, Python 隨會應. 無論是伊看--有抑是看--無你的命令, 伊攏會應. 看--無伊就回--講: "我毋知你佇講啥物", 順紲共你講伊感覺佗位毋著:

>>> dfdfee
Traceback (most recent call last):
  File "", line 1, in
NameError: name 'dfdfee' is not defined
>>> 

莫驚著伊講甲落落長, 橫直[huînn-ti̍t], 有一个 Error 就是伊看--無, 後擺咱才詳細了解伊是佇咻--啥物.

咱來寫伊看有个, 像:

>>> print("Hello")

Hello

>>>

>>> 2+5

7

>>>

問伊 Hello, 就應你 Hello, 叫伊算數, 閣袂重耽，隨算予--你. 你有注意著--無? 一算了, 馬上出現三支角 >>> 佇等待你紲落來的新命令。

簡單講: 看著三支角 >>>, 就是換你講話, 落命令。 揤 ENTER, 代表換 Python 照你的命令去運行, 若有啥物結果抑是錯誤, 佇下一逝共你報告!

這就是應聲模式的特色!

啥物是命令窗 (Command line Window)

佇所有應用程式內底, 有一種較特別ê, 號做命令窗 (Command line Window)

命令窗, 事實上是古早電腦留落來 ê 痕跡。

一開始个電腦, 無 si̋ng 這馬个電腦。
這馬用電腦, 你會使那[ná] 聽音樂, 那寫文章, 寫到忝--ê時, 隨佇網路頂踅街。

欲仝時做這三咧代誌真簡單, 就踮電腦桌面揤揤--咧, 就跳三个窗仔, 一咧成[tsiânn]作音樂播放器[pòo-hōng-khì], 一咧成作網路遊覽器, 一咧成作文字編輯器。 用鳥鼠仔佇這三个窗仔跳來跳去, 就好阿.

古早電腦 圖片來源:維基百科                     

古早電腦, 就干焦拍字機咧, 你揤一字, 螢幕就出現一字. 揤進入(ENTER), 電腦就開始研究你揤入所有个字, 照伊了解處理--煞, 踮下跤共結果顯示予你。這結果, 嘛是干焦一逝字 抑是幾落逝字 niâ-niâ.

這款一句來, 一句去个方式, 號做應聲模式 [interactive mode, 華語:交談模式]. 就干焦鑼仝款, 有摃才有聲, 摃一聲, 應一聲。因為你揤个字句, 就干焦命令電腦去做代誌, 這種使用方式, 就號做 命令逝 (Command Line, 華語: 命令列), 又號做 Terminal(台羅:tó-mo-nòo], 華語: 終端機), 又叫做 Console (台羅: káng-sò, 華語: 控制台)

較早, Terminal/Console 是全世界的電腦攏生做按呢. 這馬, 只是電腦桌頂濟濟程式中--ê 一咧。普通人無啥用著伊, 毋過對寫程式个人, 抑是耍電腦 ê 高手, 伊由原是重要 ê 家私。
佇 Linux 頂, 有幾落款, 像 Gnome-terminal, Konsole, rxvt, xterm, 佇 Windows 頂嘛真濟, DOS 著是上出名ê一咧

窗仔門 （windows) ê 概念

這馬逐家揤開電腦, tō 跳出媠媠 ê 畫面. 普通咱叫伊號做桌面. 桌面頂有一寡細圖,號做 icon [Ai-Khòn, 華語:縮圖]
這寡細圖, 一咧著代表一種應用程式[ìng-īong-tîng-sit](Application). 比如講欲聽音樂, 欲寫文章, 欲畫圖, 欲上網, 你愛用貓鼠仔(Mouse/華語:滑鼠)去揤無仝 ê 圖, 親像這咧圖:

佇這咧桌面, 有三 ê 物件, 有个是矮閣闊, 有个是躼跤, 有个踮頂懸, 有个hőng 崁佇下跤。論真講, 程式是運行佇電腦內底个電路,咱人是看無--ê. 若按呢生[sinn], 咱人欲按怎和伊溝通咧? 就是倚靠這三个四四角角 ê 窗仔門 (windows, 華語: 視窗)。這三的窗仔門,量其約代表三的應用程式。

現代每一咧應用程式,攏有一咧專門个學問,就是愛設計伊欲按怎和使用人接接[tsih-tsiap], 這種學問, 號做 GUI [ku--i, 華語:使用者介面] 設計. 窗仔門 就是 GUI ê 重要零件.

簡單講, 窗仔門是你佮程式交換資訊 ê 窗仔, 你 uì 窗仔叫伊畫圖, 伊就踮後壁畫圖, 畫好才共圖囥佇仝一咧窗仔, 抑是另外一咧窗仔予你看。會使一咧程式有幾落个窗仔, 嘛會使幾落个程式鬥陣用一咧窗, 看 GUI 欲按怎設計予人感覺好用閣好看!

這馬, 有一間有名个公司號做 Microsoft [mái-ku-lo-so (莫閣囉嗦)，華語: 微軟], 伊 ê 產品攏號名 Windows, 像 窗仔 8 (windows 8), 窗仔 10 (windows 10). 毋過, 咱講个窗仔毋是伊!

Python 紹介

Python 是一種電腦語言.
伊簡單學, 閣有夠力來解決問題和完成你向望伊做个各樣工課。

伊是荷蘭(Nederland) 人  Guio van Rossum (Gí-To-Huan-Ló-Siān?Google 翻譯)所起造 ê 電腦語言. 踮 1989 年 12 月, Guio 佇欲過 Christmas 時感覺無聊, 著決定欲寫一咧新 ê 語言. 伊揀 Python 這咧名, 是因為伊是彼時一咧號做 Monty Python's Flying ê 馬戲團 ê 戲迷.

Python ê 英文意思是一種大蟒蛇[Bóng-Tsuâ]. 這就變做伊 ê 標誌.

咱講 Python 是好用 ê 家私頭仔, 有幾落个角度來看:
首先, 伊簡單學. 佮這馬較出名个幾咧電腦語言比並, 親像 Perl, C, C++, Java. 伊是語法簡單好學. 欲入手嘛真簡單。

紲--落來, 伊有真濟捌人做好 ê 工具. 咱做啥物代誌,無法度逐件攏uì頭家己來. 捌人若有好勢 ê 物件, 著佮伊抾來用. 囥這寡好物 ê 所在, 號作程式倉(tshng). Python 有蓋濟用途無仝 ê 程式倉. 無論你有想著抑是想袂到, 人攏攢便便(tshuân-piān-piān) 佇遐. 巧人就會先去程式倉揣合用 ê 工具.

落尾, Python 佇網路頂, 有真濟活跳跳个社團佇維護, 使用, 和討論. 伊本身嘛閣佇咧進步，你欲問問題(m̄ng-būn-tê) 嘛有通人回答, 討論。

對初學者來講, 伊是簡單入門. 毋過, 伊毋是耍物niâ-niâ, 嘛會使來賺食(tsuán-tsia̍h). 無論是耍趣味抑是袂賺食, 伊攏是一咧袂䆀 ê 選擇

Python ê 安裝

佇這篇，咱介紹普通套件 ê 安裝。閣有另外這種有人共你攢便便 ê 方式，號做 Anaconda，你會使揀你較佮意ê

若佇 Linux 頂安裝 Python, 愛先佇命令窗(Terminal) 下跤, 起字(key)

$ sudo apt-get install python3

抑是

$ sudo yum install python3

頂懸命令內底 apt-get 是 Debian 款个 Linux ê 家私頭, yum 是 Fedora 款 ê Linux ê 家私頭，是去雲頂 (Cloud) 去掠套件 (Package, 毋知會使講包袱仔無?) 轉來裝。佇遮，咱是掠 Python/Python3 轉來。

安裝好, 試看莫有好勢無:
$ python3
若出現
>>>

按呢著完成阿!
若佇 Windows 頂安裝 Python, 愛先去 Python 个官網 捎轉來安裝. Windows ê 安裝應該真簡單, [下一步] 揤揤揤 niâ-niâ. 若是有人需要，後擺才另外寫一篇來專門講。

現此時, 有 python 2 和 python 3 兩的主流版本.

python 2 目前閣真衝. 你若干焦起 (key) "python", 目前大部分電腦本底就是去叫 python 2, 愛特別加一咧 "3", "python3" 才會叫 python3 起來運行.

毋過, 時代是向前行。緊慢攏會行向 Python 3. In 有小可無仝, 咱若是拄開始學, 就直接 uì Python 3 學起! 若有拄著和 Python 2 無仝个所在，我會佇特別點醒。