佇 Linux 來看GPX 檔案

最近定定有戶外活動。使用𤆬路機 (GPS) 來記錄行過的路線。普通我記錄路線，攏是用手機仔抑是專門个𤆬路機，罕得用電腦來看。
毋過，"仙人拍鼓有時錯，跤步踏差啥人無"。有一擺我無細膩，袂記得共一擺活動的路線收煞起來，閣直接開始記錄下一擺的活動，按呢共幾落擺活動濫濫做伙，按呢記錄都亂去矣。這寡記錄閣攏真寶貴，毋甘放捒，欲按怎咧? 只好用電腦來試看有法度來救無?

啥物是 GPX 擋案?

欲救進前，愛先熟似一个物件? 電子用品記錄的路線，上尾是用啥乜形式儉起來? 伊上尾是囥佇機器內面，檔尾是 GPX 形式的檔案。GPX 就是專工來記錄路線標準。仝一个 GPX 檔案，毋管啥乜機器，抑是程式來讀，攏會得著仝款的路線。所致欲處理這个問題，愛先揣你機器的 GPX 囥佇佗位，欲按怎共伊 kok-pì 到電腦內。

我是用 Android 手機頂仔的 Oruxmaps 程式，伊的 GPX 是囥佇手機仔的目錄樹 internal storage/oruxmaps/tracklogs 內底，用 USB 線接好電腦佮手機，共伊 kok-pì  就好矣。

欲用啥物 È-phù 咧?

Linux 頂有啥乜 È-phù (App) 會當用? 一開始我嘛毋知，就愛問 Google 看覓。揣著這篇文章  10 Best Free Linux GPS Tools，就揀頭名  Vikings 來試看。

安裝 Vikings

佇 Linux/Ubuntu, 安裝是桌頂拈柑的代誌:

$ sudo apt install viking

使用

拍開會看著這个畫面:

共 GPX 檔案讀入來

用貓鼠去揤 F 檔案 -> O 開啟 (Ctrl-O)，去 Linux 檔案樹拍開你的 GPX 檔

愛注意:

•  F 檔案 頭前的英文字, 是予人有另一个選擇去用齒盤(Keyboard), 就是用 Alt-F 來代替貓鼠揤檔案, 我照伊顯示的寫
• 因為這个 的中文翻譯毋是蓋齊勻，所意有當時你會看著內面是英文，有當時是英文佮中文濫做伙，佇這个時陣我是照抄。
• -> 的意思是連紲的動作, 就是先用貓鼠的倒鈕揤 F 檔案，等看著 才閣揤 O 開啟 (Ctrl-O)

今伊讀入來的畫面:

你會看著三簇離真開，這是三个無仝的活動路線，咱毋知這是佇佗位，愛共地圖鋪起，用貓鼠倒鈕點 Default Map，閣揤正鈕->屬性(P)->地圖類別，會出現濟濟地圖，

我直接揀 OpenStreetMap (Mapnik)。按呢地圖就鋪起lih矣:

共 GPX 剁做一橛一橛

你愛先去點倒爿的路線，伊會顯示 "軌跡"，閣點 "軌跡"，下跤就是欲處理的 GPX。我想欲共伊分開，就愛先對 T 工具 -> Splitter (Shift-Ctrl-L) 起動剁線功能，才用貓鼠去點欲剁落去的點:

你會看著加出 #2, #3 的路線，這就是切好的路線，你會使佇後壁的角仔格共勾仔禁抑是開，來看是毋是你欲挃个。若是確定彼是你欲挃个，就是彼个路線揤

鳥鼠正鈕->Export Tracks as GPX

 按呢生就共這個路線剁好矣。

上尾ê修正

路線本底的名嘛是記錄佇 gpx 內面，你直接用鳥鼠倒紐揤落去，若是伊反色，就會使改名。

閣有幾个所在愛閣si-a-gè 一个，攏是佇揤路線->鳥鼠正鈕->屬性 中：

• Properties 頁： Description 的開始時間抑是結束時間可能毋著:你愛先用其它頁的資料手動改一咧，像我是用高度-距離彼頁的時間來改。你看佗一頁的資料先簡單就先去參考。
• 路線有加的點: 有時間你切的所在無準，可能會加幾點，這時愛用
    T 工具->Edit Track Point (Shift-Ctrl-K)
  來編輯，點彼點，浮出一個窗仔，點刪除(D)就好

  

快速共地址輸入 Garmin fēnix 6 的方法

Garmin fēnix 6 Pro 有支援𤆬路 (華路: 導航) 功能。毋過, 伊的輸入功能真兩光。若是等伊手錶的方法來輸入甲好, 喙鬚就拍結矣!

我無意中看著這个影片, 是先利用手機仔來輸入地址, 才送過手錶仔去:

Garmin Fenix 5x Entering a destination or address the easy way - Sendpoints App

fēnix 5 會使, fēnix 6 應該嘛會用得, 就來試看覓!

其實, 完全照伊的步序做就會成功。

安 Sendpoints

這真簡單, 就是用手機的 Garmin IQ 去揣 Sendpoints 來安裝, 並且共伊安起lih手錶內面

這有 Sendpoints 這個應用程式的介紹:

https://apps.garmin.com/zh-TW/apps/93712e86-cec9-48c3-b18e-2a87aefead91

拍開 http://www.sendpoints.us/

這是 sendpoints 的服務網站, 真清爽的畫面, 就一逝予你起字的所在爾爾。

一開始看著網路地址落尾的 us, 我閣驚講是毋是干焦美國才會使用? 咱中文佮日文是毋是無法度用?
後來我試用中文發現無問題。
日本我就先 Google 一个 "品川王子大飯店", 揣著伊的英文/佮日文羅馬字是 "Shinagawa Prince Hotel", 伊真緊就揣著, 會跳出四個號碼, 你愛共伊記起來。

後來我試日文假名嘛無問題.

共位置儉佇手錶

揤正爿頂懸的 4 號鈕 (活動鈕)，一直試 2 (UP, 頂) 抑是 3 號鈕(DOWN, 下) 乎伊來到 Sendpoints, 你會看著 HASH 畫面, 共四個號碼起入去, 伊就會囥佇 "已儲存位置/Saved Location)

檢查

仝款揤正爿頂懸的 4 號鈕 (活動鈕)，一直試 2 (UP, 頂) 抑是 3 號鈕(DOWN, 下) 乎伊來到 "導航/Navigation", 入去內面揣 "已儲存位置/Saved Location)"， 你應該會看著一個位置是 "品川王子大飯店"，閣入去看地圖, 有看著:

就代表伊的位有準，也代表前一篇安裝的 OpenStreetMap 的日本地圖有準!

後記

去日本實驗的結果, 這地圖是準个。用佇行路騎車來𤆬路，好用!

Garmin fēnix 6 安 OpenStreetMap 的地圖

最近買一支 Garmin fēnix 6 Pro Solar 的手錶。伊有濟濟功能，佇健身，野外活動親像peh山，騎孔明車，走標，甚至趨雪真好用。

伊已經有先囥臺灣地圖(是 TOPO Garmin Cycling,  有修改過, 專工予自輪車用个), 世界基本地圖 (Worldwid_DCW), 佮世界趨雪場的地圖 (Garmin Ski Map)。

其中, TOPO 佇臺灣上出名就是 "魯地圖 (MOI.OSM - Taiwan TOPO)"  。這是台灣一群專業閣熱心人士來維護的開放地圖，用佇peh山真方便。

魯地圖

魯地圖， 會號這个名是伊的頭人維護者的英文名 Rudy。因為 Ru 和 "魯" 音相倚!

華語是 ㄌㄨˇ, 台語是念 lóo。

 "魯" 這字其實佇華語真罕得用, 除了書有讀著古早孔子公是 "魯國人"。這馬閣流行 "魯蛇", 是英文 Loser 的音譯!

毋過，臺灣人對這字會感覺真親切，因為伊定定予人借來做台語 "滷肉/滷卵" 的替用字成做 "魯肉/魯蛋"。而且，lóo 這个音定定出現: 佇細漢定定予爸母罵 "我會予你lóo--死"，抑是罵人 "你真lóo" 呢! 佇遮這个lóo, 是另外一字 "惱"!

若是欲予音較倚英文音，應該是 "Lu" 較成。我建議台語翻做 "旅(lú)地圖"。音義攏峇!

開放地圖/OpenStreetMap

世界閣有一个足大的開放計劃，號作 開放地圖/OpenStreetMap，伊是眾人鬥陣合作來起造的地圖。目前看起來已經袂輸一寡專門佇作地圖的公司。目前真濟專業地圖攏是用伊做底緻，閣共家己較專業的部份添起哩。旅地圖中方  (MOI.OSM - Taiwan TOPO)" 的 OSM, 就是 OpenStreeMap 的簡單寫!

共 OpenStreetMap 囥入去 Garmin 機器

Garmin 本身有伊家己的地圖。毋過彼愛開錢去買。
這馬嘛有網站佇共 OSM 地圖轉去予 Garmin 機器使用。我的 Garmin fenix 6 pro solar  本身有支援地圖。 我來試看覓添入日本地圖會用得袂?

參考:  Free maps for Garmin brand GPS devices，這馬伊改去 BBBike

點入去頂仔的網站，你會看著一个世界地圖，有一格一格。這一格就是上細个單位。今咱想欲日本的地圖：

你會使直接揤倒手頂懸，共伊放大，徙振動，才來揀你欲挃的彼格。毋過伊有方便你較緊揣著你欲挃的地圖。比如講，日本， 你就用 "Choose a predefined country:" 共 "Asia" 挩--落來，直接揀 "Japan":

伊就會自動共佮日本的地圖格仔攏揀起來，我欲添掠外的 title，就共 "Perhaps you'd like to add some additional tiles" 撓勾(華語: 打勾)，揤 "Download map now!"，伊就會進入一个畫面予你去捎地圖轉來:

愛注意: 有時陣伊閣會愛你起--入去 (key in) 你的電子批信箱 (email)，彼有可能是你揀个地區最近無人來搝--落(khiú--loh, Download)。譬如講，規日本的地圖傷大，無法度齊囥入去你的機器，你干焦欲去東京附近。你就干焦揀彼幾个，這伊閣愛時間做，做好才閣寄批予你。

伊有幾落款地圖，看你是用窗仔門(Windows), Mac, 抑是 Linux。無就是直接會使囥佇 GPS SD card 的 osm_generic_tiles.zip。這擺，我是直接用 osm_generic_tiles.zip。

囥入去你的 Garmin 機器

共  osm_generic_tiles.zip 敨--開，是孤一个檔案 gmapsupp.img，我共伊改名做 japan.img，共我的 Fenix 6 用伊的 USB 線接去電腦，會看著一个路草: 

點入去 GARMIN 內面，共 japan.img 貼落。等好勢，揤

共這个機器退出，才共 USB 線拔出來。等待手錶共地圖讀入來。

檢查地圖

手錶拍開，入去 "地圖"，揤 "地圖設定" -> "地圖" --> "設定地圖"，內底有幾落个地圖，確定新个地圖有起來 (active)，若無就揤 START 共伊起動。

紲落來，共地圖徙振動，到日本看覓仔有物件無:

若有看著，應該就會用得。有好用無好用，就愛到日本現場看覓才知影囉!

落尾

這个方法，我是佇 Garmin Fenix 6  頂懸試。毋過，有支援地圖的 Garmin 機器真濟攏會使。你會使先 Google 看覓，先看伊有支援無。因為世界各國的地圖攏有，所以真方便。

人講食果子拜樹頭。咱用這款 Open source 予咱真濟利便。若是有閒有法度，嘛是會使共 in 鬥相共，親像捐錢，抑是共鬥編地圖，共佗位毋著報予 in 知，攏是真好个方式!

Linux 螢幕校正

最近佇學攝影 (liap-iánn). 我攏佇電腦整理相片。

毋過, 定定佇我的 Laptop 頂仔看起來色緻閣會算正常的相片，擲入去 LINE，佇手機仔內面看起來色緻煞烏趖趖。有時會予老師罵講這相片 "曝光(pha̍k-kng)不足" 也敢交出來, 按呢實在是真冤枉!

後來，攝影老師借我一隻 x-rite i1 Display Pro專業色彩校正機器乎我試看佇 Linux 按怎做。

我記得較早佇 Linux 頂做色彩校正足麻煩的。毋過這擺發現伊加真簡單。

參考這篇文章: How to color calibrate your monitor in Linux， 照步來就 kha̋n-jó 起來。毋過，有一寡鋩鋩角角嘛是愛小注意一个。這篇文章有介紹一寡色彩的基礎智識，若有閒嘛是會使共伊斟酌看，順紲練英文。我佇遮干焦共我佇 Ubuntu Linux 頂懸的實驗，一步一步共伊寫落來，後擺若是有人欲作，就照起工來行就會使。

環境佮器材

我實驗的環境是 Ubuntu Linux 19.10 (Eoan Ermine)。
x-rite i1 Display Pro, PCHome 有佇賣

安裝 DisplayCal

用 Google 抑是去伊官方網站去掠: 揤落你會看著這個畫面:

揤綠晚中方 Get DisplayCAL，伊會走去

你會使看著，伊支援真濟 OS，咱就揀 Linux:

揣 Ubuntu 19.10 (Eoan) 的 x86_64, 共伊搝落來。

紲落來安裝，若是順利，你干焦佇 Terminal 落:

# dpkg -i displaycal_3.8.8.1-1_amd64.deb

就結束。若是拄著錯誤，親像

dpkg: 因相依問題，無法設定 displaycal：
 displaycal 相依於 python-wxgtk3.0 (>= 3.0) | python-wxgtk2.8 (>= 2.8.11)﹔然而：
  套件 python-wxgtk3.0 未安裝。
  套件 python-wxgtk2.8 未安裝。
 displaycal 相依於 python-numpy (>= 1.0)﹔然而：
  套件 python-numpy 未安裝。
 displaycal 相依於 python-psutil﹔然而：
  套件 python-psutil 未安裝。
 displaycal 相依於 libsdl2-mixer-2.0-0﹔然而：
  套件 libsdl2-mixer-2.0-0 未安裝。

你就愛事先共這寡欠的包袱仔攏安起哩:

sudo apt install -f python-wxgtk3.0  python-numpy python-psutil libsdl2-mixer-2.0-0
sudo apt --fix-broken install

這 sudo apt --fix-broken install 是因為閣有依賴的包袱仔 (dependent package) 的問題，叫 apt 去共伊修理予好。按呢生，你閣來行 dpkg -i displaycal_3.8.8.1-1_amd64.deb 應該都無問題囉。

開始校正 - 設定

1. 先共 x-lite i1 Display Pro 的 USB 頭插入去電腦的 USB 空
2. 拍開 displaycal，看你欲用命令 displaycal 抑是對 GUI 開攏好。若是你是頭一擺拍開， 伊會自動去 ArgyllCMS 網站去掠一寡需要的資料轉來，伊嘛認得你使用的彩色校正器是佗一款，自動去掠伊的需要的物件來。若是第二擺以後，就直接走去 3
3. 你會看著一个金光閃閃的起磅畫面，落尾停佇遮:

• Settings 有濟濟無仝的設定，普通 Laptop 是使用 Gamma 2.2，你會使用 Default (Gama 2.2) 抑是 Laptop (Gamma 2.2)。我是揀 Laptop。
• Display 伊會自動揣著你的螢幕是佗一款。若是你有接兩台，你愛揀你欲調整佗一台。
• Instrument 會顯示你的校正器，像我用的 i1 DisplayPro.
• Mode 因為我是 LCD 螢幕，所以改 LCD (generic)。

紲落來切到 Calibration 彼搭 (Tab)

Calibration settings 起勾 interactive display adjustment
Calibration speed 會使調整速度，看你有趕時間無? 當然愈慢是愈準。

按呢都差不多會用來開始

校正

先共色彩校正器 i1 DisplayPro 的蓋拍開，掛佇螢幕，予伊對頂懸垂落來，親像按呢:

共 DisplayCal 上下跤的 Calibrate & profile 揤落去， 伊會出現一个四角型，你會使調整伊的位置佮大細。上好是踮中方，揤 start measurement:

你會看著一个窗仔號做 Interactive display adjustment，中方會閃幾落擺無烏色，白色，鳥鼠仔色的四角，等到 Interactive display adjustment 的 Start measurement 會使揤，就共伊揤落去:

過無偌久，紅色, 綠色, 藍色的長線就捅出來。in 的長度無仝。若是理想，愛調整到中方三角型的所在。毋過，目前我閣無看著伊有法度雕到遐。有可能我用的螢幕攏是俗物。

而且，愛注意: 你螢幕的光度，會影響著這個部份的值。像我共伊揤較光抑是較暗，伊紅綠藍的長度就無仝, 你上好愛固定伊的光度。

不管按怎等，伊攏袂自動停，所以等一段時間，揤 Stop measurement， 閣揤 Countinue
，伊就開始紲落去..

這時間閣愛真久....， 等到結束了後， 會出現:

你會使看覓伊的內容, 去勾 Show profile information:

倒手爿彼張圖，是顯示你的顯示器偌有才調: 若是彩色的範圍愈大愈倚外面彼輾白色的框，表示你的螢幕有法度表現的色彩較濟。
若是無問題，就揤 Install Profile 來共伊安入去電腦內面, 出現這:

揤 "匯入",

按呢揤 OK 就結束啊!

佇 GNOME 中方檢查看覓

你若是用 GNOME 3 / GNOME SHELL, 開正手爿頂懸的設定值 --> 裝置 --> 色彩:

會看著出現一個新的，有日期的 Profile，你會使切過覓佮舊的敢有啥物差別無?

Ubuntu 變啞口 (Audio has dummy output)

uì升級到 Ubuntu 19.04, Disco Dingo, 我的電腦忽然間變啞口. 雖然你會當佇正手頂懸看著喇叭的音量符號, 毋過無聲. 你入去 設定->音效 裏去看伊的輸出裝置, 干焦會看著 Dummy Output. 我小搜揣網路, 有看著這个討論綰:

Fix No Sound (Dummy Output) Issue In Ubuntu With SND HDA Intel

一開始照伊講个步序行, 攏無法度解決我的問題:

檢查

1 先落 lsmod|grep snd_hda_intel 來檢查有這寡 Má-tsìo (module) 無?

結果是有

# lsmod|grep snd_hda_intel
snd_hda_intel          40960  4
snd_hda_codec         131072  4 snd_hda_codec_generic,snd_hda_codec_hdmi,snd_hda_intel,snd_hda_codec_idt
snd_hda_core           86016  5 snd_hda_codec_generic,snd_hda_codec_hdmi,snd_hda_intel,snd_hda_codec,snd_hda_codec_idt
snd_pcm               102400  5 snd_hda_codec_hdmi,snd_hda_intel,snd_hda_codec,snd_hda_core
snd                    81920  18 snd_hda_codec_generic,snd_seq,snd_seq_device,snd_hda_codec_hdmi,snd_hwdep,snd_hda_intel,snd_hda_codec,snd_timer,snd_pcm,snd_hda_codec_idt,snd_rawmidi

2 落 檢查 Audio 晶片的資訊:

確定是 Intel 晶片, 是用 snd_hda_intel 無毋著。精差彼版本無仝, 我的有較新淡薄仔:

# lspci -nnk | grep -A2 Audio
00:1b.0 Audio device [0403]: Intel Corporation 7 Series/C216 Chipset Family High Definition Audio Controller [8086:1e20] (rev 04)
 Subsystem: Dell 7 Series/C216 Chipset Family High Definition Audio Controller [1028:0534]
 Kernel driver in use: snd_hda_intel
 Kernel modules: snd_hda_intel

試伊的方法

伊講佇 /etc/modprobe.d/alsa-base.conf 尾溜添一逝: options snd-hda-intel model=auto, 我就用 root 身份, 用文字編輯器 vim (抑是任何你慣勢用个) 共伊添入去. 當然用伊的方法嘛會用得, 這是仝款的意思

# echo "options snd-hda-intel model=generic" | sudo tee -a /etc/modprobe.d/alsa-base.conf

紲落來重開 (reboot).

毋過按呢無較縒。

閣共 model 改做 auto

# echo "options snd-hda-intel model=auto" | sudo tee -a /etc/modprobe.d/alsa-base.conf

嘛無路用。看來是無步矣, 欲按怎呢?

上尾的絕招

當佇頭𢯾佇燒的時陣，佇下面的討論粽捾(discuss thread)巡巡咧, 看著有人講, 愛落:

# pulseaudio -k && sudo alsa force-reload

就免重開機。

我就共伊試看覓, 結果按呢生聲音就走出來矣, 彼 輸出裝置 就成做 喇叭 - 內部音效 矣 。

所以，這的問題對我來講, 解決方式就是修改, alsa-base.conf, 重開機, 閣用這個絕招.

愛特別注意: pulseausio -k 干焦會當佇普通使用者 (normal user), 袂使佇 root  身份.

Google Calendar 定定出現歹物仔

最近, 我的 Google Calendar 定定出現莫名其妙的 "活動", 點入去親像按呢:

這文字看無， 共 "Вам поступил перевод " kok-pì (Copy) 起來, 貼入去 Google 翻譯，知影伊是露西阿 (Russia) 文。

當當我共伊揭挕捒，隔轉工伊閣出現，有時陣一出現就是規個月三十工滿滿，真齷齪，刣袂離。就愛想一个辦法來解決。

原來這活動是透過 Gmail 添入來个。Gmail 有一个功能是: 若有人寄邀請予你，伊就會自動添一个活動去 Google 曆日。就算我已經共彼張批擲入去糞埽桶(Trash) 抑是設做糞埽批(垃圾郵件) 嘛無路用。

後來揣著方法是按呢，這干焦會使踮桌面版的 Google 曆日設，袂使佇手機版的 Ep (App)

1. 揤正手頂懸，六齒的 Gí-a icon，出現 Mé-nìu (Menu) 了後，入去 一般設定 這个 Thé-phù (Tab)
2. 揣 "自動新增邀請"，共伊揤落，改做 "不, 只顯示我已經回覆的邀請"
3. 切過去 "畫面顯示設定"，揣 "顯示已拒絕的活動"，佇頭前的四角框，若是有一个勾勾仔，就共伊揤落去，予勾仔無--去。

毋過，我感覺上好的辦法是: 直接佇 Gmail ，設定 --> 篩選器和封鎖的地址 中方，共彼个電批 (Email) 的地址封鎖--起來。

倒退攄的煞鼓 -- 佮伊佮做伙

←前一篇 

到今，咱已經共所有倒退攄所需要的倒退攄攏搜揣出來，這馬是時機來共伊佮做伙。咱先來看伊的圖:

一棧一棧的實作，是囥佇 layers.py。

伊主要的程式，是囥佇 two_layer_net.py。

咱來斟酌解說一个:

    def __init__(self, input_size, hidden_size, output_size, weight_init_std = 0.01):
        # 開始攢好勢
        self.params = {}
        self.params['W1'] = weight_init_std * np.random.randn(input_size, hidden_size)
        self.params['b1'] = np.zeros(hidden_size)
        self.params['W2'] = weight_init_std * np.random.randn(hidden_size, output_size) 
        self.params['b2'] = np.zeros(output_size)

        # 共伊一棧一棧疊khi
        self.layers = OrderedDict()
        self.layers['Affine1'] = Affine(self.params['W1'], self.params['b1'])
        self.layers['Relu1'] = Relu()
        self.layers['Affine2'] = Affine(self.params['W2'], self.params['b2'])

        self.lastLayer = SoftmaxWithLoss()

這前半段佮神經網路的學習相siâng。

第二段是使用一个特別的資料結構: OrderedDict 來共一棧一棧整--起來。

啥乜是 OrderedDict 咧? 簡單講，伊是一款字典 (Dictionary)，毋過伊會共添入去的資料照順序排予好勢。原在字典內面的資料，是用 Khí(Key) 來揣出來，伊是無順序，由在 Python 家己去安排。按呢有啥乜好處? 小等你就知。

向前行

主程式是 gradient()，一開始就呼 (khoo/call) self.loss(x, t)，

    def gradient(self, x, t):
        # forward
        self.loss(x, t)

        # backward
        dout = 1
        dout = self.lastLayer.backward(dout)
        
        layers = list(self.layers.values())
        layers.reverse()
        for layer in layers:
            dout = layer.backward(dout)

        # 設定
        grads = {}
        grads['W1'], grads['b1'] = self.layers['Affine1'].dW, self.layers['Affine1'].db
        grads['W2'], grads['b2'] = self.layers['Affine2'].dW, self.layers['Affine2'].db

        return grads

這 loss() 就是共向前行(Forward propagation)，softmax 和 error function 一擺做到底。

    # x:入力データ, t:教師データ
    def loss(self, x, t):
        y = self.predict(x)
        return self.lastLayer.forward(y, t)

loss() 分兩步: predict() 佮 lastLayer.forward()，也就是共上尾彼 SoftmaxWithLoss() 另外做。

    def predict(self, x):
        for layer in self.layers.values():
            x = layer.forward(x)
        
        return x

predict() 嘛是有影簡單。一个 for 箍輾，照步來，去呼 layers 內面，逐棧的 forward() 函式。照頂懸 __init__() 所指定，就是照 Affine1， ReLU1, Affine2，一个一个呼伊的 forward()，共逐棧的輸出，成做會一棧的輸入。

這就是 OrderedDict 好用的所在，我毋免一个一个寫出來，用 for loop 就好。

倒退攄

佇 gradient() 內底，dout = 1 做參數開始，先呼上尾棧 lastLayer 的 backward()。紲落來這幾逝嘛是用  OrderedDict 的奇巧:

        layers = list(self.layers.values())
        layers.reverse()
        for layer in layers:
            dout = layer.backward(dout)

因為伊是照順序，我共伊的值捎出來，共伊顛倒反 (layers.revers())，閣用 for 箍輾，伊就是倒退攄囉。

結束了後，咱欲愛的 W1 和 W2 的改變，是囥佇 Affine layer 內底 (參考 layers.py 的 Affine Clase)， 所以愛共伊掠出來:

        grads['W1'], grads['b1'] = self.layers['Affine1'].dW, self.layers['Affine1'].db
        grads['W2'], grads['b2'] = self.layers['Affine2'].dW, self.layers['Affine2'].db

擲轉去。

轉去 20181028 這工

 20181028 這工是咱頭一擺來訓練神經網路。gradient() 就是囥佇 train_neuralnet.py 內面使用，咱得著的 grads, 是予伊用來改變 network_parameters: 

    grad = network.gradient(x_batch, t_batch)
    for key in ('W1', 'b1', 'W2', 'b2'):
        network.params[key] -= learning_rate * grad[key]

紲落來才閣進行下一擺的訓練。

uì 20181028 講到今嘛年外，講甲落落長，伊上重要的觀念就是共正港的數學微分，伊的運算方式，改用倒退攄的方法。倒退攄，其實就是共微分个運算拍破，分解做上基本的神經元有法度算。按呢生會使予會算數速度加有夠緊，按呢才有實用的價值。

寫到遮，應該共神經網路上基本的原理講到一个崁站矣。這个系列嘛欲踮遮到煞鼓矣。這本書: 

Deep Learning｜用Python進行深度學習的基礎理論實作 

後半段閣有袂少內容。毋過，完全共人用心血寫落來的書囥佇網路頂予人免費看，按呢嘛無好。向望逐家若是有興趣，會當去共伊交關一咧。

因為是利用做工課掠外，有閒的時間才寫，有當時閣會懶屍，所以進度真慢。總是，佇寫的時陣，才會了解台語欲寫專業的物件，會拄著啥乜困難，解決的方向是佗一爿? 加一个行業有人用台語寫作，就加一个行業的專有名詞會生--出來。各行各業攏有人用台語寫，台語才會健康生湠落去。特別是上新个智識，咱莫共家己母語限制佇厝內，抑是懷舊爾爾。

←前一篇