Python ê 基礎 -- 流程控制 (Flow control)

流程控制 (flow control) 是欲予會當發揮 Python 閣較大力量的基礎。
佇咱學過 Strings，變數，名單(Lists)，算數的方法了後，咱會使開始做一寡較複雜的代誌。

進前咱介紹的程式，攏是一條腸仔直直迵到底，無轉斡，無踅箍輾。毋過，咱若欲應付真實的世界，是蓋複雜。干焦按呢，是無法度佇佇江湖走傱。

有時咱愛按照無仝的狀況來作做無仝的代誌，這時，就愛用 if。
有時，相sia̋ng (華語: 類似) 的代誌，咱干焦改一屑屑仔，其他攏仝款，咱會使用 while, 抑是 for，才免仝款的 code 寫幾若遍。

有流程控制的程式，就毋是像直迵的程式，逐逝你寫的程式碼攏會躘過，有一寡會跳過，有一寡會行幾若遍。親像遮的 if, while, for 等等的詞，是 Python 留--落來做流程控制用个保留字。袂使提來做變數使用，嘛袂使凊彩捎來就亂用。咱愛按照伊的使用方式:按怎開始，按怎結束，按怎寫。
後壁，咱就會分別來介紹 if, while, for 等等這寡流程控制的用法。