Android 手機仔安裝 Oruxmaps

若是頭一擺來我, 建議你先來遮踏話頭.

定定peh山个人, 攏會安裝 Oruxmaps (台羅: Óo-luk-mè)這个軟體.

伊是一種地圖軟體, 伊使用 ê 地圖是一種離線地圖. 和 Google 地圖無仝, Google 地圖是囥雲頂, 行到佗, 才隨時uì Google server 搝落來. 所以, 你个手機隨時攏愛黏佇網路!

離線地圖毋免. 伊是全部囥佇你个手機裡. 就算你入去飛航模式, 嘛是會用得!

伊是免費, 自由ê軟體. 毋過, 毋知為啥乜, 你無法度佇咧 Android 頂仔 ê Google Play免費安裝, 看伊的網頁, 干焦是違反 Google 付費 ê 政策. 毋過, 咱猶原會使 uì 伊的網頁直接安裝:

Ourmaps 安裝

佇手機頂, 用 Google Chrome 開 Ourmaps ê 官方網站: http://www.oruxmaps.com/, 你會看著幾落个版本, 現此時我看著个是 7.2.1, 揤:

Current version (7.2.1)

伊就會自動共伊 ê APK 檔搝--落來, 順徙問你欲安裝--無? 你應好就好阿

安裝臺灣 peh 山地圖

拍開 Taiwan TOPO 網頁, kā 網頁徙到到這个所在:

 OruxMaps 自動安裝

我 ê 電信商是中華電信, 所以直接點 Map, Style 伊就會自動安裝.

我 ê 方案是食甲飽, 所以愛去 OruxMaps 內个 "整體設定->地圖->Wifi下載" 共伊禁khiah.

Map 安裝

你點 Map 了後, 看來袂振袂動, 毋通閣亂揤, 莫離開 OruxMaps, 伊這馬當佇 kā 地圖搝落來. 你若用指頭仔, uì 螢幕上頂懸, 向下跤捋落來, 會看著伊當佇 "下載中", 耐心等伊結束. 若是離開 OruxMaps, 安裝就斷--去囉!

Style 安裝

kā Map 仝款, 毋過siű--一个就結束阿.

DEM 安裝

這就愛用手動阿.

咱先共伊搝落來囥佇手機阿裡, 才閣kā伊 kok-pì (Copy) 入去 Oruxmap 內底:

若是 Chrome, 你就揤落載(下載), 伊就會儉去手機裡

揣一个檔案管理軟體, 若是無, 去 Play Store 起 "file manager", 就會出現幾落--ê, 揀一个來用, 我是用 ASUS ZenUI ê 檔案管理.

拍開 ZenUI 檔案管理軟體, 你會看著 moi-hgt-v3.zip. 佇 moi-hgt-v3.zip 點兩个, 閣點 "解壓縮", 伊就佇現此時 ê 目錄解--開, 伊个路草是 sdcard>Downoad>moi-hgt-v3/.

入去 sdcard>Downoad>moi-hgt-v3/, kā 全部 ê hgt 檔選--起來, 才閣佇正爿頂面揤 "移動至" 或 "複製到", 才閣揤 "內建儲存空間->oruxmaps->dem", 落尾揤 "確定" 就好阿!

看地圖有安裝好勢--無?

佇 "切換地圖->OFFLINE" 你會看著 MOI_OSM_TAIWAN_TOPO_RUDY(MAPSFORE), 若無看著, 小揤頂懸兩个箭頭佇圓箍仔內底 ê 更新 (Refresh), 若看會著, 就揤一个換--過去.

閣紲落來換 style (華語: 風格), 這佇我的安裝, 和影片無仝, 是愛揤正手頂仔彼三條線 ê 細圖, 才閣揤 Mapfsforge風主題, 選 MOI_OSM:

另外, 嘛是會使uì "地圖調整->Mapsforge風格主題" 來改!

你會使設定欲看偌濟物件: "地圖調整->Mapsforge風格主題->微調Mapsforge主題", kā你想欲看 ê 物件勾起來.

若是想欲看山 ê 影跡, 就是去 "地圖設定->Mapforge設定->增加山坡陰影" 共伊勾起來!

按呢生就全部結束阿, 落尾, 建議是共 cache 摒挕捒 "地圖設定->重建地圖快取"

.

安裝日本地圖

有時欲出國, 若有通安裝離線地圖, 嘛袂䆀.

用 Google chrome 開 https://www.openandromaps.org, 入去了後, 揤 Map Downloads-> Asia, MiddleEast, 共網頁趨落去下面, 有一个表, 有真濟國家.

揣著日本, 揤頭前彼个 "+", 就有真濟安裝方法予你揀:

我揀 Android on OruxMaps, 伊就自動開始安裝阿! 仝款, 愛有耐心小等一个, 會當用指頭仔 uì 螢幕頂捋落來, 你會看著掠地圖 ê 進度條:

等到結束, 就完成阿, 你會使去 "切換地圖" 看日本地圖 JAPAN_ML(MAPFORGE):

這馬, 你會使揀伊來看日本地圖, 你會予伊顯示日文/英文, 干焦揤 "地圖調整->Mapforge地圖語言"

欲按怎予 Android 手機 ê Youtube 影片會用佇幕後搬?

若是頭一擺來遮，請來踏話頭。

為啥乜有這个問題?

這是因為 Youtube 頂仔有真濟好个影片，有時陣咱干焦想欲聽歌，抑是聽課。譬如講佇開車的時目睭看頭前，抑是佇捷運頂仔，你耳機勾咧，搖搖擺擺。你無欲看螢幕。

毋過，現此時 ê Youtube 若開，就一定愛共螢幕嘛開咧。若螢幕禁--起來，聲嘛綴咧無--去。螢幕開咧有兩的䆀處: 首先是真了電。螢幕是真食電--ê。無佇看閣開--咧，電白白了--去。

第二，無細膩去磕著螢幕。因為這馬手機仔 ê 螢幕是控制手機仔上主要 ê 所在，若是一直開咧，無細膩磕著，有時是共音樂暫停。較嚴重是無細膩就磕袂著就敲一通電話出去。尤其是你佇坐捷運時，手機是囥佇落袋仔裏，身軀振動抑是和人相磅真四常。無，你只好用手攑牢牢較安全。

若是 Youtube 會用佇背景運行/幕後運行，這寡問題就解決阿。因為你會使共螢幕關起來，這時，閣省電，螢幕嘛無作用。

啥乜是幕後運行

佇 Android 系統內底，你佇螢幕看會著，號做 "桌面"(Desktop)。佇桌面運行，號做幕前運行(Foreground)。因為手機 ê 螢幕細，普通 APP ê 設計攏是: 一擺干焦會使有一咧 APP 會使佇咧幕前抑是桌面。若是你點一的新的 APP ê ICON, 共伊拍予開，伊就浮去桌面運行，原本佇桌面行--ê，就先暫停，猶原佇 RAM 裡，這就是走入去幕後。舉例講，你開 Youtube，伊就走來幕前，這時你閣開 Chrome，Youtube 就暫停，影片嘛袂繼續。這時，Chrome 走前，Youtube 退入幕後(background)。

共螢幕禁起來，嘛是仝款概念: 所有會 APP 攏無佇幕前。

毋過，有一寡特別設計 ê APP in 會用得佇幕後運行。親像電話，電子批， LINE，facebook，因為按呢你才有法度收著上新 ê 訊息。這款你無看著嘛佇運行--ê，就號做<幕後運行>

欲按怎予 Youtbue 幕後運行

Youtube 這ê APP 是無支援幕後運行--ê。干焦若是付錢予 Google 才會使，另外嘛人寫有這種功能 ê APP 來趁錢。毋過，咱欲免錢 ê 方法。

上簡單就是安裝 firefox。毋過，毋是干焦裝起來，佇 firefox 起開 Youtube 就好，閣有一咧鋩角: 愛共  開啟桌面版網站 拍開，你若是揤 firefox 倒手爿ê頂懸，就會看著下跤這張圖:

這咧選項，是共 firefox 像桌面電腦按呢來開這咧網站，莫用網站為手機版準備 ê 資料。按呢生愛掠資料會較濟，手機仔處理起來會較慢。畫面嘛較歹看: 佇手機頂小小 ê 面頂爭一堆物佇內底。毋過，咱若是欲聽 Youtube 爾爾，這是免錢會好辦法!