Python ê 應聲模式

Python 有兩種運行的模式, 一種號做戲文模式, 另一種是應聲模式。
戲文模式佇遮紹介.


應聲(interactive, 華語:交談) 模式, 就干焦兩人佇答喙鼓, 你就和 Python 佇答喙鼓. 你講一句, 伊隨喙就應。這模式其實是 uì 命令窗仝款个意思.
這馬, 咱先來欲起動應聲模式, 就是干焦佇命令窗內揤 "python3", "ENTER", 看著三支角 ">>>", 就入去應聲模式。

這咧時陣, 你踮內揤啥物, 上尾揤 ENTER, Python 隨會應. 無論是伊看--有抑是看--無你的命令, 伊攏會應. 看--無伊就回--講: "我毋知你佇講啥物", 順紲共你講伊感覺佗位毋著:

>>> dfdfee
Traceback (most recent call last):
  File "", line 1, in
NameError: name 'dfdfee' is not defined
>>> 

莫驚著伊講甲落落長, 橫直[huînn-ti̍t], 有一个 Error 就是伊看--無, 後擺咱才詳細了解伊是佇咻--啥物.

咱來寫伊看有个, 像:

>>> print("Hello")

Hello

>>>

>>> 2+5

7

>>>

問伊 Hello, 就應你 Hello, 叫伊算數, 閣袂重耽，隨算予--你. 你有注意著--無? 一算了, 馬上出現三支角 >>> 佇等待你紲落來的新命令。

簡單講: 看著三支角 >>>, 就是換你講話, 落命令。 揤 ENTER, 代表換 Python 照你的命令去運行, 若有啥物結果抑是錯誤, 佇下一逝共你報告!

這就是應聲模式的特色!

啥物是命令窗 (Command line Window)

佇所有應用程式內底, 有一種較特別ê, 號做命令窗 (Command line Window)

命令窗, 事實上是古早電腦留落來 ê 痕跡。

一開始个電腦, 無 si̋ng 這馬个電腦。
這馬用電腦, 你會使那[ná] 聽音樂, 那寫文章, 寫到忝--ê時, 隨佇網路頂踅街。

欲仝時做這三咧代誌真簡單, 就踮電腦桌面揤揤--咧, 就跳三个窗仔, 一咧成[tsiânn]作音樂播放器[pòo-hōng-khì], 一咧成作網路遊覽器, 一咧成作文字編輯器。 用鳥鼠仔佇這三个窗仔跳來跳去, 就好阿.

古早電腦 圖片來源:維基百科                     

古早電腦, 就干焦拍字機咧, 你揤一字, 螢幕就出現一字. 揤進入(ENTER), 電腦就開始研究你揤入所有个字, 照伊了解處理--煞, 踮下跤共結果顯示予你。這結果, 嘛是干焦一逝字 抑是幾落逝字 niâ-niâ.

這款一句來, 一句去个方式, 號做應聲模式 [interactive mode, 華語:交談模式]. 就干焦鑼仝款, 有摃才有聲, 摃一聲, 應一聲。因為你揤个字句, 就干焦命令電腦去做代誌, 這種使用方式, 就號做 命令逝 (Command Line, 華語: 命令列), 又號做 Terminal(台羅:tó-mo-nòo], 華語: 終端機), 又叫做 Console (台羅: káng-sò, 華語: 控制台)

較早, Terminal/Console 是全世界的電腦攏生做按呢. 這馬, 只是電腦桌頂濟濟程式中--ê 一咧。普通人無啥用著伊, 毋過對寫程式个人, 抑是耍電腦 ê 高手, 伊由原是重要 ê 家私。
佇 Linux 頂, 有幾落款, 像 Gnome-terminal, Konsole, rxvt, xterm, 佇 Windows 頂嘛真濟, DOS 著是上出名ê一咧

窗仔門 （windows) ê 概念

這馬逐家揤開電腦, tō 跳出媠媠 ê 畫面. 普通咱叫伊號做桌面. 桌面頂有一寡細圖,號做 icon [Ai-Khòn, 華語:縮圖]
這寡細圖, 一咧著代表一種應用程式[ìng-īong-tîng-sit](Application). 比如講欲聽音樂, 欲寫文章, 欲畫圖, 欲上網, 你愛用貓鼠仔(Mouse/華語:滑鼠)去揤無仝 ê 圖, 親像這咧圖:

佇這咧桌面, 有三 ê 物件, 有个是矮閣闊, 有个是躼跤, 有个踮頂懸, 有个hőng 崁佇下跤。論真講, 程式是運行佇電腦內底个電路,咱人是看無--ê. 若按呢生[sinn], 咱人欲按怎和伊溝通咧? 就是倚靠這三个四四角角 ê 窗仔門 (windows, 華語: 視窗)。這三的窗仔門,量其約代表三的應用程式。

現代每一咧應用程式,攏有一咧專門个學問,就是愛設計伊欲按怎和使用人接接[tsih-tsiap], 這種學問, 號做 GUI [ku--i, 華語:使用者介面] 設計. 窗仔門 就是 GUI ê 重要零件.

簡單講, 窗仔門是你佮程式交換資訊 ê 窗仔, 你 uì 窗仔叫伊畫圖, 伊就踮後壁畫圖, 畫好才共圖囥佇仝一咧窗仔, 抑是另外一咧窗仔予你看。會使一咧程式有幾落个窗仔, 嘛會使幾落个程式鬥陣用一咧窗, 看 GUI 欲按怎設計予人感覺好用閣好看!

這馬, 有一間有名个公司號做 Microsoft [mái-ku-lo-so (莫閣囉嗦)，華語: 微軟], 伊 ê 產品攏號名 Windows, 像 窗仔 8 (windows 8), 窗仔 10 (windows 10). 毋過, 咱講个窗仔毋是伊!

Python 紹介

Python 是一種電腦語言.
伊簡單學, 閣有夠力來解決問題和完成你向望伊做个各樣工課。

伊是荷蘭(Nederland) 人  Guio van Rossum (Gí-To-Huan-Ló-Siān?Google 翻譯)所起造 ê 電腦語言. 踮 1989 年 12 月, Guio 佇欲過 Christmas 時感覺無聊, 著決定欲寫一咧新 ê 語言. 伊揀 Python 這咧名, 是因為伊是彼時一咧號做 Monty Python's Flying ê 馬戲團 ê 戲迷.

Python ê 英文意思是一種大蟒蛇[Bóng-Tsuâ]. 這就變做伊 ê 標誌.

咱講 Python 是好用 ê 家私頭仔, 有幾落个角度來看:
首先, 伊簡單學. 佮這馬較出名个幾咧電腦語言比並, 親像 Perl, C, C++, Java. 伊是語法簡單好學. 欲入手嘛真簡單。

紲--落來, 伊有真濟捌人做好 ê 工具. 咱做啥物代誌,無法度逐件攏uì頭家己來. 捌人若有好勢 ê 物件, 著佮伊抾來用. 囥這寡好物 ê 所在, 號作程式倉(tshng). Python 有蓋濟用途無仝 ê 程式倉. 無論你有想著抑是想袂到, 人攏攢便便(tshuân-piān-piān) 佇遐. 巧人就會先去程式倉揣合用 ê 工具.

落尾, Python 佇網路頂, 有真濟活跳跳个社團佇維護, 使用, 和討論. 伊本身嘛閣佇咧進步，你欲問問題(m̄ng-būn-tê) 嘛有通人回答, 討論。

對初學者來講, 伊是簡單入門. 毋過, 伊毋是耍物niâ-niâ, 嘛會使來賺食(tsuán-tsia̍h). 無論是耍趣味抑是袂賺食, 伊攏是一咧袂䆀 ê 選擇

Python ê 安裝

佇這篇，咱介紹普通套件 ê 安裝。閣有另外這種有人共你攢便便 ê 方式，號做 Anaconda，你會使揀你較佮意ê

若佇 Linux 頂安裝 Python, 愛先佇命令窗(Terminal) 下跤, 起字(key)

$ sudo apt-get install python3

抑是

$ sudo yum install python3

頂懸命令內底 apt-get 是 Debian 款个 Linux ê 家私頭, yum 是 Fedora 款 ê Linux ê 家私頭，是去雲頂 (Cloud) 去掠套件 (Package, 毋知會使講包袱仔無?) 轉來裝。佇遮，咱是掠 Python/Python3 轉來。

安裝好, 試看莫有好勢無:
$ python3
若出現
>>>

按呢著完成阿!
若佇 Windows 頂安裝 Python, 愛先去 Python 个官網 捎轉來安裝. Windows ê 安裝應該真簡單, [下一步] 揤揤揤 niâ-niâ. 若是有人需要，後擺才另外寫一篇來專門講。

現此時, 有 python 2 和 python 3 兩的主流版本.

python 2 目前閣真衝. 你若干焦起 (key) "python", 目前大部分電腦本底就是去叫 python 2, 愛特別加一咧 "3", "python3" 才會叫 python3 起來運行.

毋過, 時代是向前行。緊慢攏會行向 Python 3. In 有小可無仝, 咱若是拄開始學, 就直接 uì Python 3 學起! 若有拄著和 Python 2 無仝个所在，我會佇特別點醒。

無眠

以下是蘇打綠 ê 無眠, 用教育部 ê 標準用字,  小可校正.口音盡量按照 Youtube 內, 我聽著 ê 青峰 ê 口音!

今仔日月娘那遐爾光                   kin-á-ji̍t   gue̍h-nîu  ná    hiah-nī kng
照著阮歸暝攏袂當睏                   tsìo-ti̍oh  gún  kui-mî  lóng   bē-tàng  khùn
連頭毛都無歇睏                          liân  thâu-m̂ng  tōo  bô  hioh-khùn
（親像魚死佇花園）                   tshin-tshīunn  hî  sí  tī  hue-hn̂g

你敢知阮對你的思念                  lí   kám  tsai  gún  tuì  lí  ê  su-liām
希望你有仝款的夢                     hi-bāng  lí  ū  kāng-khún  ê  bāng
咱兩人做陣轉來彼一工              lán  nng  lâng  tsuè-tīn  tńg--lâi  hit   tsi̍t  kang
互相依倚的情愛                         hōo-sìong  i-uá  ê  tsîng-ài

佇你的心肝內                             tī  lí  ê  sim  kuann  lāi
是不是閣有我的存在                  sī  m̄  sī  koh  ū   guá  ê  tsûn-tsāi
永遠攏咧等                                íng-uán  lóng  teh  tán
有時陣嘛會毋甘願                     ū-sî-tsūn  mā  ē  m̄  kam-guān

想講要作夥飛                            siong  kóng  beh  tsuè-hué  pue
去一个心中美麗的所在             khí  tsit-ê sim-tiong  bí-lē  ê  sóo-tsāi
所有的一切                               sóo-ū  ê  it-tshè
攏總佮你囥作夥                        lóng  tsóng  kah  lí  khǹg  tsò-hué 
希望你 會當了解                       hi-bāng  lí  ē-táng  liáu-kái
(為著你 我一定等）                  uī  ti̍oh  lí guá it-tīng táng

我毋管偌濟時間偌濟目屎         guá m̄-kuán guā-tsuē sî-kan guā-tsuē bo̍k-sái 
  偌濟失望來忍耐                     guā-tsuē sit-bōng lâi lím-nāi
我毋管你當時會轉來                guá  m̄-kuán  lí  tang-sî  ē  tńg-lâi
其實我嘛毋知影為怎樣            kî-si̍t guá mā m̄-tsai-iánn uī-tsuánn-īunn
  為怎樣憨憨等待                     uī-tsuánn-īunn gōng-gōng lâi tán-thāi

你 是我唯一的愛                      lí  sī  guá  uî  i̍t  ê  ài

懷春曲

以下是根據林英美所唱 ê 懷春曲, 儘量以教育部所定的標準台文來重寫歌詞
另外 A-Lan 所演唱的版本, 嘛真好聽!



日落西天色黃昏     馬車跑山侖
 li̍t lo̍k sai thinn-sik hông-hun         bé-tshia pháu suann-lūn

咱二人真有緣份     相會在這陣
 lán nn̄g-lâng tsin ū iân-hūn           siong-huē tsāi tsit-tsūn

阮心內真正興奮     佮著貼心君
 gún sim-lāi tsin-tsiànn hing-hùn      kah tīo tah-sim kun

手牽手做陣游賞     快樂當青春
 tshíu khan tshíu tsuè-tīn îu-síunn   khuài-lo̍k tng tshing-tshun

戀花開又媠又芳     花心一點紅
 luān hue khui īu suí īu phang         hue-sim tsit tiám âng

在等待蝴蝶飛來     守阮的花欉
 tsai tán-thāi ôo-tia̍p pue-lâi              síu gún ê hue tsâng

為著伊心情茫茫     日頭直直暗
 uī ti̍oh i sim-tsîng bâng-bâng         li̍t-tâu ti̍t-ti̍t àm

提紙筆來寫情批     寄乎伊一人
 thê tsuá-pit lâi siá tsîng-phue        kià hō i tsit lâng

在眠夢佮伊相見     散步溪仔墘

 tsāi bîn-bāng kah i sann-kìnn         sàn-pōo khue-á kînn

夢見伊對阮講起     婚緣的代誌
 bāng-kìnn i tuì gún kóng-khí          hun-iân ê tāi-tsì

初戀味情意真甜     見笑暗歡喜
 tshoo luân tshîng-ì tsin tinn           kiàn-siàu àm huann-hí

醒來才知影都是     夢見見著伊
 tshínn--lâi tsiah tsai-iánn to-sī       bāng-kìnn kìnn tio̍h i

想彼時自由自在     談情相意愛
 sīunn hit-sî tsū-uî-tsū-tsāi             tâm tsîng sio ì-ài

心對心談情說愛     歡喜無人知
 sim tuì sim tâm tsîng suè ài          huann-hí bô lâng tsainn

求神明替阮想覓     佮阮鬥催排
 kîu sîn-bîng thè gún siūnn-māi          kah gún tàu tshui-pâi

保庇阮達成希望     幸福的將來
 pó-pì gún ta̍t sîng hi-bāng            hīng-hok ê tsiong-lâi