Black Hat Python - 烏帽仔 Python 踏話頭

這篇和規个系列，攏是用教育部 ê 標準用字，若是有詞毋知意思，抑是按怎發音，會用共伊 copy 起來去教典 ê 線頂辭典查:

教育部閩南語辭典 (後面簡稱教典)
iTaigi: 若教典查無，來遮查看māi。

Justin Seitz 所寫的 Black Hat Python，臺灣是碁峯出版 ê "黑帽Python"。 規本我都讀了--阿。內底 ê 例，我嘛攏奕過一斗。閣進一步，我攏共咧改做 Python3，而且改做 class/object ê 型。
為啥乜欲加夯這咧枷? 這方面是趣味，這方面嘛是予家己有機會激頭殼一咧。

Python3 是未來 ê 趨勢。雖然目前 Python 2 閣有大量 ê 資源是 Python3 無法度取代 ê，這本書就是一例: 伊是用 Python 2 寫个。毋過，咱學物件是看未來。而且，借這咧機會了解 Python3 和  Python2 無仝 ê 所在，嘛對咱了解 Python2/Python3 這咧語言有幫助。橫直我學 Python 是興趣，是自學，無公司客戶 ê 壓力。毋過，若干焦看過，共書頂仔例拍拍咧，無予家己一寡挑戰來激頭殼，嘛連鞭袂記--得。所以我寫這个系列，就是一方面複習，一方面試看覓使用台語來寫。

我頭一擺寫的例，有想欲予 Python2 / Python3 攏會用(i̋ng) 行。毋過，我感覺按呢可能會予看的人分心，加麻煩，考慮共伊提挕捒。

我共書--裡所有的例，攏改做 class/object，台語我翻做類/物件(luī/mih-kiānn)。這會當講是我家己 ê 癖: 因為我總是想著程式，未來欲繼續發展，欲予人使用，愛按怎包裝較好。實際上，當然是我家己才會使用我家己 ê 程式。毋過這種 uì 寫 C 程式都有 ê 癖，嘛帶來到 Python這爿。所以，我佮 ê 例，和原本書頂仔ê無仝，有真濟攏是這種 class 方式ê，所以，我會先介紹 class ê 觀念和使用。

下一篇 →